立法會噚日又有小組委員會因為出席議員不足法定人數流會嘞，今次係原定昨早8點半舉行嘅私營骨灰安置所條例草案委員會，成個小組有25人，但最終得7個人去開會，較法定人數欠1人，結果流會收場。
睇番立法會秘書處資料，冇請假而最終缺席會議嘅有8個人，當中4個係民建聯議員，包括陳克勤、陳恒鑌、何俊賢同梁志祥，公民黨亦有兩位缺席者，分別係梁家傑同陳家洛，而獨立議員謝偉俊及黃毓民，同樣no show。特首梁振英將一切問題歸咎於土地問題，而呢個小組委員會主席、民建聯葉國謙似乎有樣學樣，將流會問題同拉布扯上關係，佢批評議員缺席會議，但就話正因部份議員拉布在先，令到開會時間有限：「星期四呢段時間都需要捐窿捐罅先拎到。」