六月六日星期六晚上，與大編輯閒談，他說起梁覺，問左丁山認不認識？梁覺係中大崇基校友，著名教授，點會唔識呀？大編輯話見到中文大學發新聞稿，話梁覺教授在五月二十五日逝世，令人痛惜。左丁山大叫一聲「Oh, No!」
好似只係個幾月前，先至在沙田馬會銀袋咖啡室外面碰到梁覺，左丁山仲問佢：「城大教書點呀？」佢答：「返咗中大咯，你唔知咩？」真的不知，梁教授係崇基心理學系才子，早有名氣，畢業後往伊利諾大學取得博士學位，回母校心理學系任教，對管理學極有興趣，以心理學概念及產業行為分析工具，為企業作管理顧問，例如肥佬黎成立佐丹奴之後，為訓練店員銷售技巧及不同店舖之售貨數據分析，就曾聘用梁覺做顧問，訓練店員，創辦壹週刊之後，又請梁覺做讀者分析，聚焦小組討論，對佢幾乎言聽計從。
大編輯記得1995年蘋果日報創刊後，做過無數次聚焦小組討論，由梁覺主持，小組成員在街頭邀請回來，代表不同階層市民，佢地坐在單向玻璃房內睇蘋果日報，回答梁覺問題，梁覺引導討論，十分有趣味性，大編輯話親眼見到梁覺「表演」，十分折服，後來大概做得多咗，梁覺冇再擔任主持，蘋果改派其他人負責，大編輯話：「效果差好遠，跌晒watt。」
梁覺在管理研究方面出咗名，就被城大挖角，到城大做管理學教授，卒之年前又返回中大，榮任「卓敏管理學教授」（Choh-Ming Li Professor of Management），以中大創校校長李卓敏為名之講座教授，係中大最高級別教授，梁覺讀心理學出身而成為商學院top professor，當然因為佢在學術上有卓越成就，出版過幾本書及180篇學術論文，其著作被引述過17500次，Google Scholar h-index有63點，主要研究範圍係國際管理學、公義與衝突、創意、跨文化研究方法等等。
得知梁覺死訊，怏怏不樂，佢嘅崇基師兄賓架P來電告知，梁覺於57歲生辰之日入咗威爾斯醫院ICU，疑患上免疫系統失調，估唔到就此與親友告別，不止中大，直情係成個香港痛失學術英才。梁覺生前遺願係喪禮低調，只限家人近親參加。唉，梁覺，願你在天堂安息！