6月6日小一統一派位放榜，港人最記得嘅，可能就係來自大陸嘅張太，喺鏡頭前爆seed話:「唔係我哋班大陸人嚟，你哋啲香港學校有人讀咩？係咪先？」
前年透過「優才計劃」成為「新香港人」嘅趙薇，就低調得多。其實佢都安排咗五歲大嘅囡囡、新加坡出世嘅「小四月」來港讀書。估唔到趙薇出生內地，個女喺獅城出世，喺香港受教育，竟然冇考慮到祖國喎。
前日趙薇出席杜琪峯新片《三人行》記者會，被問及有傳趙薇想讓俾個女就讀香港嘅學校並移居香港，對此趙薇首度開腔謂：「應該是的！」嗯……
趙薇其實2012年已經同老公以1.5億掃咗荃灣皇壁3個複式單位，有傳佢本來仲屬意女兒就讀位於深井嘅哈羅香港學校，該校屬倫敦哈羅公學全球第4間分校，學費一年盛惠$148,637，不過哈羅入學條件首先係英文要好，趙薇都驚囡囡應付唔到，故亦屬意九龍塘嘅耀中國際學校，不過學費仲貴，一年$169,680。一年17萬，對於入股阿里影業嘅趙薇嚟講，要喺名校網買豪宅加分，都係濕濕碎啫。