今時今日做打工仔一啲都唔容易，唔單止要俾老細壓價，用「清潔工價錢做出矽谷燒鵝味道」，更加要有廣泛嘅興趣：唔一定要上知天文下知地理，但最緊要識得Hello Kitty。
要有前線零售經驗
早兩日網上見到一個由香港疫苗中心刊登嘅招聘廣告（圖），話就話請全職助護，不過條件就有啲特別。應徵者除咗要中學畢業同有診所工作經驗之外，仲要喜愛或者熟悉Hello Kitty角色，最好有至少1年前線零售咁話。而喺公司描述一欄，就只係寫住「特色主題診所」。
一眾網友似乎對呢份工好有興趣，有人問使唔使着埋Hello Kitty公仔衫去打針，亦有人關心到底助護要推銷啲乜嘢。
費清根據廣告上嘅聯絡方法寄咗封電郵去查詢，但一直未有回音，噚日仲連個廣告都刪除埋。據費清了解，日本早兩年開咗間Hello Kitty主題牙醫診所，台灣彰化都有間Hello Kitty產科醫院。如果香港都有間咁有特色嘅主題診所，相信病人睇病都會開心啲。
費清
＃要生計，也要生活 ＃毋忘初衷