被譽為亞洲普立茲嘅亞洲出版業協會（SOPA）年度頒獎禮噚晚舉行，邀請咗壹傳媒集團創辦人黎智英擔任演講嘉賓，大談政改與傳媒生態，金句一籮籮。香港《蘋果》今年大豐收，勇奪5個獎項。
揭解放軍建雷達站
八方同事梁御和去年7月揭發解放軍獲政府秘密批地在大帽山建軍事雷達站，引起輿論譁然，佢憑呢篇獨家報道獲得獨家新聞大獎。馬來西亞航空去年兩遇空難，其中3月失事嘅馬航MH370至今仍然失蹤，《蘋果》採訪部憑全面深入嘅報道，獲得卓越突發新聞大獎。
年僅23歲嘅印傭Erwiana俾僱主虐打全城關注，八方同事彭碧珊、麥超億遠赴印尼，直擊印傭為咗養活家人離鄉別井嘅苦況，憑呢輯系列調查報道，勇奪女性議題新聞優異獎。
港人為咗爭取真普選，去年79日嘅雨傘運動為香港民主寫下新一頁。《蘋果》記者用文字、相片、影片記錄整個雨傘運動，獲卓越人權報道優異獎。高鐵延誤兼嚴重超支，但負責工程嘅港鐵最初死口唔認，結果被八方同事盧勁業多篇報道連番揭發問題，亦憑呢輯報道獲卓越調查報道新聞優異獎。噚晚有到場嘅其他行家，好似《明報》、《星島》、《南華早報》都拎唔少獎，恭喜晒咁多位！
李八方
mailto:[email protected]
