擁34D驕人身材的袁嘉敏（Candy）因接拍電影《鴨王》而一脫成名，成為傳媒焦點的袁嘉敏亦隨即是非纏身，先後有指她擺款犯眾憎，又有指她被富商通過中間人出價40萬人仔誘上床，不過事後袁嘉敏堅稱寧願靠自己拒絕賣身。昨日有周刊報道，Candy脫出錢途，在內地登台密密賺人仔，雖然經常被捧場客偷襲，不過Candy一於死忍，結果由中環唐樓搬到山頂居住。
自比米高積遜
昨日Candy在赤柱接受訪問，承認《鴨王》令她帶來不少搵錢機會，她說：「內地啲觀眾都好鍾意呢套電影，想見吓我哋真人，所以每個地方收細啲嘅金額，儲埋咪會多囉，呢啲係開心嘅辛苦錢。」Candy亦承認有時會遇上熱情的fans，問她又有否試過被人碰過重要部位？她說：「我其實唔覺得我自己好重要，所以唔介意，我唔係好明點解大家寫到我好似好受委屈，我唔比任何人矜貴，唔覺得係身驕肉貴唔可以摸。」她續說：「只係有時突然啲，有時候佢哋伸隻手出嚟好大力，掂全身任何一個部位。如果當時我見到Michael Jackson（米高積遜），我都會𢱑佢條褲。」
對於被指在山頂租樓一事，Candy說：「其實我目標係淺水灣，嗰日睇咗幾個盤都唔滿意，經紀咪畀價格相若、山頂嘅盤我睇，不過我想租番南區嗰邊，空氣清新啲。」笑問有否富商安排大屋給她住？她說：「暫時冇人用物業同我講價，大部份都係用cash。」追問當中的金額？她不願透露對方的身份：「過千萬，但係我都唔識佢，唔知佢係咪單身，但係想同我有一個長遠嘅感情關係，我同佢講如果佢公司有乜活動，可以搵我去做，我希望由一個商演合作去認識。」
採訪：嵐山
