曼聯下季換球衣贊助商，由一剔變三間，首個德政就係加推XXXXL尺碼（4XL、四加大碼）嘅「超大碼」波衫，滿足一啲噸位十足嘅魔迷。有香港波衫舖老闆話，雖然過去好少有人想買咁大碼嘅波衫，但都會入定一兩件看門口。
一剔贊助嘅年代，曼聯最大碼嘅波衫都係3XL，有啲身形太龐大嘅球迷，想買件波衫撐愛隊都唔得。雖然有球迷向球會反映過，希望有再大啲尺碼嘅波衫，據講一剔調查後發覺需求唔大，就拒絕咗呢個要求。
胸圍58吋 腰圍53吋
新人事就新作風，三間等咗咁多年，終於踢走一剔去贊助曼聯，當然即刻做嘢𠱁球迷，宣佈下季推出四個X嘅四加大碼球衣。呢款4XL波衫會放喺專門店度試賣，如果銷情理想仲會穩定咁推出市場。睇到呢個消息，我求大俠第一時間想問，究竟4XL係有幾大呢？睇番三間個網，4XL波衫胸圍有58吋，腰圍53吋，相信呢個身形喺香港都幾少見。
我求大俠問過波衫舖Kitroom Sports嘅老闆阿Kan，佢話未試過幫客人訂4XL，最大都係訂過3XL；仲話一直都有球會出特大碼波衫，而且通常都比較貴，但呢次曼聯出嘅4XL，零售價一樣係629蚊，所以會入定一兩件看門口。其實，唔少英超球會都有呢種特大碼波衫，例如紐卡素有4XL，熱刺仲有5XL，而車路士喺網上仲賣緊6XL！阿Kan同我講，以前車仔出過8XL，有行家訂咗件返嚟，但唔係要嚟着，而係當窗簾用喎。
睇中文迪蘇傑、雲達韋爾
順便講吓曼聯啲轉會消息，丹尼爾同巴塞隆拿續約，請咗紅魔食檸檬，有傳佢哋已經將目標轉去巴黎聖日耳門右閘雲達韋爾，睇嚟領隊雲高爾都係鍾意搵啲荷蘭同鄉。鋒線方面，賓施馬就話唔離開皇家馬德里，所以有指曼聯轉為求購馬德里體育會嘅文迪蘇傑。另外，英媒話曼聯將重組青訓管理，名宿畢特會接替離隊嘅麥佳亞，成為青訓主管。畢特之前係曼聯U21嘅助教，據報最近已經開始喺青訓部門工作。
識睇，一定係睇足英台【英波Live】：
http://soccer.appledaily.com
http://bit.ly/engballlive