仲有唔夠一個禮拜(下周二)，就係英國女皇安妮錦標黑衣巨人「步步友」硬撼世界首席灰馬「經濟學家」的大日子，呢場對「步步友」極重要。由於「美式法老」(AMERICAN PHAROAH，前譯「美洲法老」)日前勝出貝蒙錦標，成為37年來首匹美國三冠馬王；如果「步步友」遠征英國失敗，世界排名第一嘅地位，估計將會被「美式法老」奪去，香港馬王寶座亦有被「友瑩格」挑戰嘅危機，加埋失去女皇安妮錦標獎座，名副其實變成三失壯年。
當然，大摩唔係省油的燈，佢為咗今次遠征花盡心思部署。大家可能冇留意，「步步友」過去快跳、試閘及出賽多數戴面箍，但本月2日離港前最後大閘，極罕見只戴單邊面箍，左邊面冇嘢，靜雞雞變招；可能係針對女皇安妮係1600米直路賽，單邊面箍可令佢一早見到左邊觀眾席人群，增強鬥心，而保留右邊面箍，就防止此馬一貫以來嘅輕微內閃問題。
當然，上述只係猜測，未知最終會否戴單邊面箍上陣，但本月2號嗰課試閘，又的確走規更集中喎！