肥佬黎噚晚到場演講，大談傳媒生態，包括《蘋果》近年積極發展網上新聞，與此同時網台湧現，怕唔怕競爭？肥佬黎話越多小型獨立網台出現對傳媒生態就越好，好似一啲網台嘅stupid news，分分鐘有成百萬嘅點擊，佢話𠵱家香港人唔要資訊，估計將來75%嘅新聞係由擁有手機等流動裝置嘅人提供，「新聞將被重新定義」。佢大讚新媒體創造咗新嘅表達方法，「我哋呢啲傳統傳媒人，只會跟既定方式去表達」。
至於壹傳媒捱到幾耐？未來20年會唔會仲存在？肥佬黎就話自己20年後都好老，香港可能唔再需要壹傳媒，因為中國會改變，或者壹傳媒已被其他人取代喎。
席間有人問佢會以businessman定journalist形容自己？肥佬黎話自己係商人，仲係做新聞事業嘅商人；而佢喺雨傘運動走在最前線，唔驚被質疑政見影響《蘋果》咩？佢話「傳媒應該為大眾發聲，唔係為黎智英發聲」。有傳中央喺政改用錢買票，肥佬黎話中央徒勞無功，相信泛民堅定否決，「邊個肯做咁大個契弟？」咁肥佬黎係咪寧願唔一人一票選特首都唔要袋住先？佢咁樣答："Something has to be done."