華人練馬師今晚打出近期身價波，尤以徐雨石為甚，上半場已憑「王將」及「野外桃源」拎一冠一亞，下半場一開波，又勝出第五場三班1200米之「中華寶貝」，跑完頭五場出四駒，豪奪兩冠一亞，僅第四場「神奇飛龍」落第，馬房表現突出。
「中華寶貝」上仗一換柏寶即於同班同程大勝開齋，今鋪熱到1.9倍，結果原庄配搭再贏一次，五歲澳洲自購馬開竅連捷，人馬合作更保持不敗，騎練累積近十次合作跑谷草，勁取三冠六位，僅一駒唔入三甲。
落飛黨呢場又向輕磅大冧巴馬埋手，「財神」同「花月流星」齊着綠燈落重飛，結果雙雙三甲不入。而90歲前練馬師陳毓麟的團體馬「善勝」10倍爆冷失敗，放到尾不敵「中華寶貝」衝刺屈居亞軍。陳毓麟綽號「飛機陳」，年輕時曾打仗做空軍，能駕駛野馬戰鬥機，1979年登上冠軍練馬師榮銜，是傳奇人物。今場王賢誌愛駒「大將風馳」殺入季席，「帝國勇將」則跑第四。
徐雨石表示，「中華寶貝」今場雖然放不出，但可與上仗一樣貼到欄，令馬兒走得輕鬆，是致勝關鍵。