中大學生關注政改組織「中大諗」噚日朝早去到立法會，想交邀請信畀兼任中大校董嘅民建聯葛珮帆同自由黨張宇人，出席下周一中大舉辦嘅政改論壇，而答允出席論壇嘅另一中大校董、新民主同盟范國威Gary，就喺冇預約下帶學生進入立法會大樓，直闖二人辦公室交信。
葛珮帆事後拉埋黨友鍾樹根、陳恒鑌同何俊賢一齊見記者，譴責Gary帶住一班未經批准人士就衝入佢辦公室，職員被騷擾受驚，又感到人身安全受威脅，認為行管會要跟進。張宇人亦批評此舉無禮貌，話早前已收到學生嘅信件及電郵，諗緊點答。Gary反駁，葛珮帆作為校董，接受學生邀請係應有之義，指學生斯文交信，過程冇衝擊亦冇喊口號，質疑民建聯誇張場面，係失實指控。陳恒鑌就喺Gary回應時全程蹺手兼怒睥對方發言，火藥味甚濃。