民主黨黃成智早前話支持政改有條件地袋住先，仲搞埋聯署，同個黨立場唔同，被黨友投訴狙擊，據知民主黨紀委會已經建議革除佢嘅黨籍。主席劉慧卿話呀，中委會今晚會討論有關事件，但預料兩星期後先表決，以便黃成智有機會投出上訴。卿姐唔評論建議係咪「重手」，話一切按程序辦事，由中委投票決定。如果有六成中委支持、即係27人中有17人支持，就會通過。
八方噚日問過黃成智點睇，佢話暫時唔回應有關事件，「希望等中委會傾完先、亦好希望中委會負責任地作詳細討論」。
但黃成智話呀，非常不滿有人洩露紀委會嘅決定，「因為佢哋嘅文件同建議係保密，唔應該披露喎，披露嘅話，都應該通知我啦！」
據知黃成智都有可能喺周五、即係中委會有決定之後開記者會交代事件。