醫生C有咗孫女之後，經常留意其他人點樣湊孫及培養嬰兒，佢以前唔知唔理，現在一睇，見到一歲BB去報幼兒班已經話遲，三歲讀幼稚園之前，要上幼兒班（nursery），讀幼兒班之前，要上pre-nursery，為之頭暈，此外還有朋友送嬰兒去一間位於黃竹坑工業大廈嘅「名氣極大幼稚園」附屬pre-nursery，適合歲幾嘅BB入讀，醫生C某日特登去黃竹坑睇吓，見到朋友司機送BB上學，當然還有菲傭跟住，大廈門口有十幾架豪華房車，BB魚貫被傭人抱落車，因當日晨早烈日當空，有一兩個仲有保鑣跟撐住雨遮擋太陽，醫生C去問吓學費，好似係月收七千元，唔係個個報名都會收嘅。
醫生C話：「不要輸在起跑線，都唔需要咁呀嘛？」左丁山大笑：「有靚車，有菲傭，有保鑣護送上BB班，根本一出世已經贏晒，點會輸在起跑線，只不過香港有錢人多，新一代媽咪唔識或冇時間湊BB，情願俾錢一啲所謂好pro嘅訓練師而已！」
今天中產以上家庭之幼嬰，開步學習情況大同小異，一歲過後，識行路、識睇電視嘞，就會學唱英文歌 Twinkle Twinkle Little Star、London Bridge is Falling Down，睇卡通Peppa Pig，睇DVD嘅Frozen，再用iPad睇YouTube之無限多兒童卡通故事兒歌，未夠兩歲之小孩子已經識得用手指抹畫面轉節目，你話唔識齊呢類「標準動作」呀，返到幼稚園唔知會唔會俾老師睇小？
英國有研究指嬰孩睇卡通iPad睇得多，手指慣咗㩒遙控與key-board，要叫佢地揸筆寫字，手指唔多靈活，讀書本亦失去集中注意力。如此訓練孩子，是否會輸在起跑線？好有可能㗎。仲有一樣，因香港孩子太早學習英語（唱歌，卡通），恐怕一旦對住本中文書就會怕咗中文字，大啲到五六歲就唔鍾意讀中文，考DSE喎，牙煙啲喎。中文叻到好似陳惜姿咁，都在專欄慨嘆自己教仔讀中文十分困難啦。或者話，咪讀英文學校、國際學校、考IB囉，IB考得好，到劍橋牛津哈佛更有把握。唔，要諗吓錢先，好似高官咁，送女兒入美國Deerfield，再入Wellesley，受真真正正一流美國貴族教育冇得彈，但係學費呢？使費呢？咁高檔教育嘅產品是否一定勝過在香港讀免費小學，大學讀中大港大嘅畢業生10倍起碼呀？使費就真係起碼用多20倍以上嘞！