新世界發展（017）第三代接班人鄭志剛（Adrian）熱愛藝術，多年來積極支持本地與內地新晉藝術家，最近佢直情推出藝術課程K11 Art Infinity，兒童與年輕人都可以交學費參加，最細4歲嘅小朋友已經可以玩，學習欣賞藝術。
查實Adrian喺2007年加入新世界之後，首個擔大旗嘅項目尖沙嘴商場K11就以藝術掛帥，將商場結合藝術館嘅特色，隨後佢都不時搞藝術活動。佢𠵱家育有一對子女，就更加重視藝術教育，一年前開始度呢個藝術課程，希望小朋友同年輕人唔止識畫畫，仲識得欣賞藝術作品。
咁呢個世界冇免費午餐，學藝術當然要交學費。K11香港區營運董事胡玉君指，希望學費係大家可以負擔嘅水平（暫定小童每堂300元/青年每堂800元），長遠希望呢個計劃可以自負盈虧。