李克勤在85年奪歌唱比賽冠軍而入行，轉眼30年，予人印象離不開零瑕疵唱家班、足球狂熱分子、好爸爸，新碟《李克勤 我克勤》玩萬能key概念，要大眾自行想像他的形象。
至於李克勤眼中的自己？與幕前完全相反，不活潑合群；面對太太？攜手睇波就是浪漫；對兩子而言？是玩伴，兼施體罰的嚴父。不在乎慶祝父親節的他，說到收到「喺學校畫嗰啲鬼五馬六嘅卡」，還是不禁流露安慰笑容。
統籌：林妙萍
撰文、造型：林嘉慈
攝影：周樂恒
髮型：Adolph Bow of PRIVATE i
場地提供：Mira Moon
李克勤身份多多，對外是歌手、演員、主持，對內是丈夫與父親，新碟名稱《李克勤 我李克勤》讓歌迷自行為偶像定位，他眼中的自己又是怎樣？「其實幾似大家喺舞台上見到我嘅相反，即係唔鍾意講嘢，唔會喺屋企唱歌，唔會咁活潑，做嘢會黑口黑面。」性格與校長譚詠麟相反，「佢乜都鍾意一班人，群體生活，我係鍾意個人，我同佢做騷，佢就一大班人去食飯，我就一個人匿喺酒店食。我嘅工作範圍已經好多姿多采，好多人包圍住我，我好想多啲時間自己一個。」
老婆眼中的克勤
人前人後大不同，少唱冧歌的克勤，反而多用甜言蜜語幬結婚八年多的盧淑儀？「少少門面嘢呢，都真係好少，哈哈！最多半夜打完波，去食碗一蘭咁囉。」共同嗜好是維繫兩夫婦感情的關鍵，他們同好運動，體育世界就是二人世界，「除咗踢波佢冇參與外，其他大部份佢都有參與，睇波固然有參與，所以你見到有啲相，我哋係飛去第二度睇波，呢啲係我哋嘅浪漫。」由從前在高爾夫球場拍拖，最瘋狂一星期打十四場波，變成到羽毛球場談情，「太太有高爾夫球教練牌，但因為做咗人爸爸媽媽後，放棄咗呢個運動，一年打唔到一兩次，最近重拾羽毛球，係因為覺得細路仔瞓咗先打，簡直有發現新大陸嘅感覺。佢哋8點就瞓，可以9點先打，通常打到11點幾。」
兩子眼中的克勤
親子活動固然不可少，常帶7歲大仔Ryan及5歲細仔Rex踢足球、打高球、砌Lego，怕囝囝遇溺而強迫他們學游水，那麼囝囝眼中的克勤是……？「我點知呀？一棵搖錢樹囉，講笑啫。我都嚴㗎，friend都可以嚴，會打會鬧，𠵱家喺度講就少少，少少體罰。」下周日父親節，兩子是否早有準備？「梗係冇啦，唔使諗啦呢啲，生細路仔係要求回報嘅咩？咁諗就慘喇。你肯帶，佢肯去，已經好開心啦，係咪先？再遲啲就更加㖭啦。」作為藝人家庭，早習慣不在正日過節，「父唔父親節，都係食餐飯啫，其實通常都係提前食，或者象徵式整咗佢咪算。」每個父親節不至於難忘，但至少留下窩心回憶，「喺學校都有畫嗰啲鬼五馬六嘅卡，得佢自己明嘅圖案。」
校長眼中的克勤
嘴邊總是掛着唱歌，談到暑假面世的新碟收錄譚校長作曲兼監製的《你最重要》，雀躍講不停，「係譚詠麟送畀我嘅一個套餐，佢講咗好多年，我哋成日一齊做巡迴、左麟右李，度流程時話你出《一生中最愛》，我就《一生不變》，你《愛在深秋》，我就《大會堂演奏廳》，但有啲種類，佢出牌，我係冇嘅，譬如《你知我知》，我就冇呢支，《講不出再見》，咁我又冇。」促成校長以《講》曲為藍本創作，「錄咗幾日，邊習慣唱呢啲歌？我呢啲靚聲王嚟㗎嘛，第一日係亂咁唱。」
最近努力學結他的克勤，自嘲是幼蟲程度，「係興趣班嚟啫，又唔心急，有乜所謂啫，我係最少經驗嘅結他手，但最多機會出場表演。」第一次出騷是近兩萬人的「左麟右李」演唱會，之後表演機會不斷，「2013年彈《酒紅色的心》，係唯一一個識彈嗰段solo，但可以喺紅館表演，到我學識彈《你最重要》，就喺內地對兩萬人表演，其實唔怕，啲觀眾遠。」
【靠老婆執靚形象】
人靠衣裝，更何況是藝人，克勤偏偏怕打扮，「坦白講我唔貪靚，成日覺得自己唔靚，郭富城、李嘉欣佢哋點着都靚。」更不愛拍照，十多年來的唱片封面攝影師指定是林海峰，貪快、靚、正，只願意為藝人這個職業去花時間搞造型，「當然太太會幫吓手，唔需要我去煩，試過有階段係我唔使煩，佢乜都搞晒畀我，我發覺原來大家又覺得OK喎。」舞台下的他只求舒服，「當然唔能夠太肉酸，都係一個藝人嚟嘅，睇番係邊一類型嘅藝人，我絕對唔係巨星，係開雲吞麵舖，最多平時着啲日本牌子、吊腳褲、黑白灰。」
更多精采時尚內容，盡在 http://add.appledaily.com 。