政改決戰在即，警方嚴陣以待，經民聯立法會議員林健鋒噚日喺立法會就政改表決嘅保安安排，提出口頭質詢，保安局局長黎棟國回應時就話，警方會就可能出現嘅示威場面作風險評估，又呼籲市民唔好參加違法集結，亦唔要「煽惑」他人參加。獨立議員黃毓民發言時批評黎棟國提到「煽惑」，同共產黨文告一模一樣，質問：「黎棟國到底係咪共產黨嚟？」點知黎棟國即時以十足本土派口吻回應：「本人無黨無派，生於香港長於香港，第日都有可能係喺香港離開呢個世界。」八方想話，其實唔少土生土長嘅香港人，都可能係共產黨員嚟嘅。
至於「煽惑」呢個詞彙，黎棟國話係根據公安條例列出嘅定義同相關說明，叫毓民自己睇吓有關法例，有問題就向立法會法律顧問查詢喎。