美斯上周六順利幫巴塞隆拿贏第四次歐聯，計埋之前七次西甲，仲有三次西盃同六次西超盃等濕濕碎碎冠軍，喺巴塞已經贏咗24次冠軍。但喺阿根廷國家隊呢？以大賽計仲係零，京奧金牌勉強算係美斯唯一嘅國際大賽冠軍。
國家隊比賽同球會有啲唔同，球會財力夠，可以買唔同國籍嘅球星，好似美斯身邊有巴西嘅尼馬，烏拉圭嘅蘇亞雷斯，仲有一大班西班牙國腳。國家隊可以選擇嘅球員始終有限，仲要睇埋青訓做得好唔好、有冇新人上位。
喂，阿根廷國腳都星光熠熠啦，馬斯真蘭奴喺球會同國家隊都係美斯好幫手，仲有英超神射手阿古路、希古恩同迪馬利亞等勁人，美斯冇得賴喎。不過，一踢國際賽，所謂為國家光榮而戰，就出現唔同效果。阿根廷本身存在河床同小保加兩大派系鬥爭，已經唔係新鮮事，泰維斯長期被打壓，同小保加幫失勢都有啲關係。美斯細細個已經去巴塞隆拿，搞到兩大幫都冇撐佢；佢喺國家隊最老友，就係嚟自獨立隊嘅阿古路。而且要帶領阿根廷，最麻煩係要走出馬勒當拿陰影，搞到美斯一日未拎到世界盃，始終都好難取代老馬地位。
其實上年世界盃，美斯已經做足本份，但同冠軍始終差一線；今次美洲盃，巴西有主力缺陣，東道主智利又唔夠平均，美斯應該係最接近國際大賽冠軍嘅一次嘞。
文：牽牛