個性直爽兼有義氣的劉嘉玲不單在娛樂圈吃得開，性格冷若冰霜的王菲亦視她為閨蜜，沉默寡言的男神梁朝偉選了她為終身伴侶。近年她投身商界，一樣是長袖善舞，廣結善緣，到底她有甚麼迷人的魔法？趁着蘋果20周年，就請她參與《我Q你答問會》，由13位途經旺角的幸運市民來發問，現在就讓嘉玲親自來回答大家！
採訪：陳月媚
1.曾先生：你覺得有冇人靚仔過梁朝偉？邊個？
嘉玲：唔係冇嘅！但都幾難……哈哈哈！係咪好誇張？
2.張小姐：你會唔會做家務，洗吓碗咁呢？
嘉玲：我會做家務㗎！但我唔會洗碗囉！廚房啲嘢我冇乜興趣，我亦都唔識，咁家務我會插吓花、佈置吓屋企，即係靚嘅嘢，我鍾意做啲乾淨同靚嘅嘢，廚房嗰啲嘢畀工人做啦！分工合作吖嘛！
3.何小姐：你點睇偉仔頭號fans杜如風？
嘉玲：佢嘅粉絲有好多，點解杜如風係頭號呀？我唔知喎！佢做咗啲乜咁頭號呀！我知道佢（偉仔）身邊有好多粉絲，有啲跟咗佢幾十年，嗰啲粉絲都非常錫佢。
4.蔡先生：你會唔會揀飲擇食？有冇啲嘢你一定唔食？
嘉玲：我都幾唔揀飲擇食，我乜都食，除咗榴槤唔鍾意食，但𠵱家我要keep住身材，都要忍吓口。
5.張小姐：你鍾意食乜嘢零食？薯片、朱古力、雪糕嗰啲係咪戒晒？
嘉玲：薯片、朱古力、雪糕都鍾意食，比較鍾意食薯片，不過𠵱家都係少食為佳！
6.葉先生：你同偉仔，夜晚開燈瞓定熄燈瞓？
嘉玲：哈哈哈！咁梗係熄燈瞓啦！開燈點瞓啫！我係唔可以有少少燈光同聲音嘅，我仲要塞埋耳塞先瞓得，因為我一有少少聲，就算蚊飛過我都聽到。
7.黃小姐：如果你再出碟，繼張信哲之後，你想同邊個合唱？
嘉玲：如果再出碟呀？學友啦！我想同學友合唱一路係我嘅心願嚟嘅，我想合唱一啲比較深入少少嘅歌啦！
8.張小姐：聽聞你屋企成日開party，你會招呼大家食啲乜？
嘉玲：以前就多啲，因為梁生唔係咁鍾意出街，咁即係啲朋友聚會多數都係嚟屋企，咁佢會舒服啲。Party食啲乜嘢？都係嗰啲嘢啦！Barbecue、打邊爐或者buffet囉！
9.陳先生：你有冇睇《武則天》？覺得范冰冰做成點？
嘉玲：范冰冰嗰套《武則天》呢，我就真係未睇！我睇佢個production都係好豪華同好靚。我有睇過李麗華同埋劉曉慶嗰套《武則天》。
10.何先生：你覺得劉德華好戲，定梁朝偉好戲？
嘉玲：梁朝偉好戲啲！劉德華好氣力啲！哈哈哈……係呀！我係好偏心嘅！
11.Janice：如果TVB重播你一套劇，你希望邊一套？
嘉玲：最好唔好啦！因為我都冇一套做得好嘅！哈哈哈！
12.蔡小姐：嘉玲姐，其實你有冇鍾意嘅卡通人物㗎？
嘉玲：有呀！我鍾意Betty Boop，即係嗰個黑白卡通人物大頭妹！
