有宗教人士用貓和主人，比喻中央和香港的關係，指貓如果表現乖，便不須用籠困着牠。
就此，我們訪問喵星人，了解貓界看法。
訪問喵星人很困難，你不能逼喵星人現身。
喵星人有絕對的話事權，心情好便出來，心情惡劣便躲在家中，任主人呼喊得聲嘶力竭，說不出來就不出來。
頗有詩仙李白那種「天子呼來不上船，自稱臣是貓中仙」的味道。
不像京官對香港議員，叫你上來深圳便要你即日仆上去。
Sorry，如果香港人是貓，你落嚟香港見面就差唔多。
各位，今天運氣好，喵星人主動出來了。
「你覺得香港人像貓嗎？」
「如果做貓做到香港人，我寧願一頭撞死……反正我有九條命。」
「為甚麼？」
「你試吓俾啲劣質貓糧要我『食住先』，我即刻出爪！」
「喵星人係唔會妥協？」
「Sorry，貓先係主人。主人係服侍隻貓，貓奴，你哋聽過未？」
「人類嘅語言叫『為人民服務』囉。」
「仲有，宗教界人士話有啲貓會抓壞傢俬，如果貓乖啲就唔使困籠。」
「喵！佢知唔知貓點解要抓傢俬？唔係我哋唔乖，係我哋要磨爪，呢個係天性！」
「佢要防止抓壞傢俬，唔係用個籠困住啲貓，呢啲係法西斯暴政！正確做法，係俾一啲磨爪嘅木柱，等我哋喵星人可以有適當地方去磨爪！你要疏導，唔係禁制貓嘅天性啊！」
「但係喵星人，主人提供食物住所，聽佢話都好應該吧？」
「喵喵喵！你望吓一單外國新聞啦！美國有對夫婦，俾隻貓趕咗出門口，搞到要報警求助！」
「點解咁惡？」
「因為隻貓剛剛生咗貓仔，為咗保護子女，發惡趕主人離開自己家園！」
香港人和貓的共通點：為了下一代，我們也會不惜一切，和所謂的「主人」對抗！