人稱女電王、電力一姐的李小琳去向成謎，近日喺內地成為熱門話題。話說中國電力投資集團與國家核電集團最近合併，原本為中電投副總經理的李小琳，竟然消失於新公司管理層名單。有傳媒話，佢調咗去大唐電力，但又被否認，整件事撲朔迷離。熟悉國情的人士就會知道，成件事背後唔簡單。
按慣例，中紀委要打背景深厚的大老虎，通常會用一招調虎離山。例如中石油集團董事長蔣敏潔落馬前一年，就先被調去國資委坐咗一年冷板凳。其他最近出事的大老虎，例如令計劃、蘇榮等，都係先調去統戰部、政協等虛職，等中紀委慢慢查，收集證據。李小琳貴為前總理李鵬之女，今次無法上位，反而調去其他地方投閒置散，如果最後連大唐電力都去唔到，更加凶多吉少。
黃尹華