「小小超」李澤楷嘅得力助手顏金施（Wendy）今年3月離開盈大地產（432）後，最近有新動向，主要做建築工程嘅建聯集團（385）噚日宣佈，委任顏金施做非執行董事，即日生效。
50歲嘅顏金施喺2000年過檔去幫小小超之前，喺太古地產（1972，佢任職時公司仲未上市）擔任營業及市務主管，盈大𠵱家市值19億元，太古A（019）市值900億元，佢做開大企業，家陣忽然去呢間市值7.5億元嘅建聯擔任非執董，唔通佢真係做得累了，想搵間公司做非執董，有需要時畀吓意見，咁就心滿意足？
佢當年去幫小小超，主要就係負責數碼港住宅項目，佢以「香港蒙地卡羅」包裝貝沙灣項目，直到𠵱家都仲係賣樓界一個茶餘飯後嘅話題。