可能係人太蠢，又不及鍾樹根博士般知識淵博，有些廣告，唔知點解，睇來睇去，都係滿腦子問號。
我所講的，係近期一個吸人眼球的廣告。吸睛，係因為主角是BB豬謝安琪。她人靚聲甜，纖纖十指在水晶琴鍵上舞動，以十級溫柔的聲線邊彈邊說：「堅持完美理念，擁抱明天科技，彈指之間為商業客戶譜出雲端樂章」。
一句普通之極的說話，出自她口，即時變得好有詩意。但在浪漫感覺沉澱過後，除了得出「謝安琪真係幾靚」嘅結論外，她所講的人話，聽起來卻好像火星話，好玄。
如此玄之又玄的廣告，並非九倉電訊的第一次。他們之前已經有兩個廣告，同樣係深過黑洞。一個是人氣王Mandy Lieu彈結他，她的一句「九倉電訊？Sell咩？No mouth is too big」之玄妙，足以揮低黎明「左手又係肉，手心又係肉」的金句。另一個日韓組合Girls Kingdom又跳又唱演繹商業雲端功能，同樣堪稱廣告史上一大懸案。
唔明係正常，因為我們都係凡人。九倉電訊服務對象擺明是商業客，廣告自然唔係拍比路人甲睇。不過，我的問題是，廣告這一行凡事講求「On Target」，受眾既然唔係普羅大眾，咁點解又要拍電視廣告，仲要係師奶台播放，咁同倒錢入大海有咩分別？若然他們的終極目標是要開拓受眾，爭取coverage，提高知名度，咁點解又要用上咁多jargon，拍完一個又一個咁難消化嘅廣告？
有時候，睇廣告，就好似睇「十萬個為甚麼」，少一點智慧，都不能明白箇中真諦。就如某基金最近的一個平面廣告，主題明明是團結香港人，卻用上一班非一般港人，如霍啟剛、林奮強、梁錦松、羅康瑞等人，再加一人一句「同心同德、齊創未來」之類的說話。我好疑惑，這樣的廣告，究竟能夠團結幾多人？
But anyway，懂不懂其實不重要，九倉電訊廣告每播一次，唔少人還是會坐定定的再看一遍，原因很簡單，就是因為她──BB豬。
廣告連結：
謝安琪： https://www.youtube.com/watch?v=ZW9YnpS0RzU
Mandy Lieu： https://www.youtube.com/watch?v=UW-BbaCAaVI
Girls Kingdom： https://www.youtube.com/watch?v=aIlmACGvDbs
文廸晞
mailto:[email protected]