美洲國家盃嚟到，又係時候討論個好多人講嘅話題──美斯踢國家隊點解冇踢巴塞隆拿咁好？小弟覺得係美斯喺巴塞踢得太好，先出現呢個討論。
點解美斯喺巴塞踢得咁好？足球唔係一個人嘅運動，美斯喺巴塞踢得稱心如意，唔單止建基於本身嘅技術，仲有佢對戰術嘅理解，同埋隊友之間嘅默契。巴塞體系自告魯夫執教以來一脈相承，嚟到千禧年，由列卡特到安歷基，嗰套以控球為主嘅戰術一直冇變，美斯瞌埋對眼都知大概點踢。恩尼斯達、沙維、布斯基斯、碧基以至丹尼爾呢啲球員同美斯已經夾到熟晒，佢哋唔單止熟大家嘅風格，仲擁有同一套理念，成個體系自然運行得好，大家都發揮得好。
相反，喺阿根廷國家隊，由比爾沙到馬勒當拿，個個教得嗰一兩年貨仔，到沙比拿先叫定落嚟，𠵱家又轉咗馬天奴，真係冇連貫性！比爾沙係打快同逼搶，馬勒當拿就唔知踢咩，都唔識用美斯；沙比拿就打穩守同反擊，同埋識確立美斯做核心。睇番自沙比拿接任令阿根廷踢法穩定落嚟後，美斯喺2012年至14年間29次上陣入26球，場均入0.9球，同佢今季喺巴塞場均入一球，其實差唔遠。
球王又好，打工仔又好，公司有套穩定嘅規矩，做慣做熟，當然順手又快手。如果上頭朝令夕改，一陣要鬆啲，一陣又鍾意緊啲，變嚟變去，工作出嚟嘅效果就自然差啲。
文：咖喱