噚日收市閒情寫咗六個星座，今日當然找數俾埋另外六個你睇。我係好煩嘅，最鍾意戴頭盔，又講多次，性格可以左右命運，但唔可以決定命運，祝大家好運，繼續牛市。
天秤座（9月25日－10月23日）
「股票編號：9394，價格1元，數量10000」天秤座嘅你，資料已經入好晒，只要輕輕點擊「確定」，就可以成為呢隻9394嘅股東。就係只差呢一步，撳好？定唔撳好？撳唔撳好？都係唔好，掛底幾格，0.95元。呀！死啦，佢跌到落0.97元啦，點算呢，都係唔買啦，一點即按「取消訂單」。
天秤座買股嘅心情，就好似行鋼線時咁，左左右右，猶猶豫豫。買股都拖泥帶水，明明受隻股分咗手，仲要經常開《蘋果投資王》望吓佢。望吓佢。如果佢爆升，就無限追悔，如果佢喪跌，就心情大好。Come on！明明隻嘢唔關你事，向前望啦唔該。對住天秤，真係要唱番首逝去感情如何留得住，半點痴情遺忘殊不易，更多悽悽慘慘的遭遇，我不知道……
天蠍座（10月24日－11月22日）
哎呀，呢個星座對我來講係最難寫嘅星座，因為天蠍座嘅股民，非常低調Low profile，你叫我諗個場景出來寫，我諗咗好耐都諗唔到，最多只係：夜幕低垂，天蠍座嘅你，埋頭苦幹研究喺一堆數據，可以話係股壇獨（毒）行俠。
炒出，你Mark低，炒入，你又Mark低。睇住呢啲炒出炒入嘅往績，你又再研究下圖表，歷史Pattern，終於，你發現了一種必勝炒法！至於係咩？作為神秘的天蠍座，你會回答我：「我是絕對不會告訴你的。」
天蠍座仲有一個非常大嘅優點，就係意志堅定，戰鬥力旺盛！輸咗，唔怕，起身再來過！「我冇咁易被打沉嘅！」
人馬座（11月23日－12月22日）
「隻9394今朝公佈配股呀，開市實爆升，衝唔衝好？」「你唔衝我衝呀，我買輪呀！」人馬座，就係一個敢於冒險嘅星座，時刻如箭在弦，主動出擊。正所謂唔賭唔知時運高，博一博，無頻撲，高追狗衝No problem！見隻股勢色唔對？「止蝕閃人啦！仲諗？！」
「喂！你上次買嗰隻9394今日再爆過呀！」「係咩？None of my生意。」冇錯，人馬座就係咁灑脫，沽咗貨後話知你升定跌，過去就過去，字典裡沒有後悔。你試下同佢講呀，「你之前賺呢水賺咁多，咁快就唔記得佢，你識唔識感恩架？」「感恩？我真金白銀俾錢買架！感恩，你都Short Short地。」
山羊座（12月23日－1月20日）
「你隻9394升咗一成啦。」山羊座瞄一瞄個股價，淡淡然的說，「未到價。」
「你隻9394高位隊咗一成呀！」山羊座瞄一瞄個股價，思考咗一陣，「會升返。」
山羊座性格，一個字，悶。不過正正因捱到悶、捱到價，所以有能力放長線，釣大魚！呢隻鍾意坐長途機嘅羊，只要佢搵到目標，佢只可以一直咁飛呀飛，飛到攰嗰陣就係機入面訓覺。呢種羊最終都會落機，就係到價嘅時候。
山羊座踏實，所以好著重基本因素，亦好鍾意睇Valuation。漢能（566），遮仔（1027）呢啲市值大到唔合邏輯嘅神仙股，山羊座眼尾都唔會望。
水瓶座（1月21日－2月19日）
「隻股隊緊呀！」「快啲啦，同我成板掃晒佢。」如果想炒細價股炒得叻，真係可惜你不是水瓶座。呢個星座，正正就係別人笑我太瘋癲，我笑他人看不穿嘅星座，「大佬呀，炒股緊係睇莊啦，唔係仲睇基本因素呀嘛？！」水瓶座就係唔鍾意墨守成規，所以好多時係人買我沽，人沽我買。
「如果穿咗呢個價位，咪止蝕囉，但如果向上突破，上面冇頂架！用一成博冇頂，係咪抵博先？」水瓶嘅你，明顯係鍾意投機多過投資。
水瓶仲有一個優點，就係名副其實Social精，把口啷過油，朋友多自然收風多，加上有小聰明，非常啱炒細價股。
雙魚座（2月20日－3月21日）
星期一嘅時候，「個市好似唔對路。」「係啦，我都覺，所以我都沽得七七八八。」
星期三嘅時候，「個市好似見咗底。」「係啦，我都覺，今朝我喪買嘢。」
雙魚座炒股，講嘅係Feel，講直覺。直覺睇好，就炒爆倉，直覺睇淡，就沽清倉。睇直覺之餘，又好易受人左右諗法。如果朋友同你持相反方向，雙魚就諗，「又好似係。」然後就跟咗朋友嘅睇法。
去到第二日，「唉呀！早知信自己啦。」
延伸閱讀：12星座炒股方程式（上集）
http://hk.apple.nextmedia.c......state/art/20150610/19178664
by千頌C@堆填區
http://fb.com/winbigwok