【扮靚籽：潮界開眼】
冇搞事！今次扮靚籽殺入旺角絕對係真鳩嗚！好多人聽到旺角就諗起窄身衫皮褲同成身鎖鏈的打扮，錯晒！其實旺角嘅衫褲鞋襪種類不知幾多，由未賺錢嘅中學生到月入三萬的事業女性都實搵到心頭好。
成日嫌MK唔夠檔次，今次我哋就實買實着，用平民嘅價錢着出名牌嘅味道，仲要演繹四種唔同風格，由西洋菜南街走到花園街，搖滾的停在潮特、文青會走到旺中、哈歐美日韓的自然逛到百貨花園，豐儉由人。錢還是要慳，唔睇戲、唔去日本都買唔到樓，幾百蚊買套衫扮吓靚，𠱁吓自己都得啩？
記者Winny 肉地韓國風
身價：$229
條裙太窄揳唔到衫？可揀一件橡筋腳的上衣去調整，嫌middle length裙太成熟，加番件百搭白衫同頭帶就balance番晒！
花園街充斥大量「韓國」衫褲，是否韓國製對我來說並不重要，因為就算去到當地，都見到好多強國出品。我的購物之道還是睇款行先，pattern靚摸上手夠舒服，剪口冇甩線就得；現時韓國流行鬆泡泡的時裝，容易着到冇晒身形，但都以線條簡單、少details和整齊為依歸。自己屬於微胖肉地型，唔可以盲跟，上身要揀恤衫或較鬆身的麻質衣服，下身就要揀較貼身的裙子或可揳上衣的A字褲，收番腰腿線條，看上去身形更修長！
另類選擇：$140
一直最愛花恤衫，因為潮得來夠decent，襯裙夠斯文，但配這條A字短褲即時活潑番晒，襯對白皮鞋已經可以去任何場合！
記者Barbara 經典歐美風
身價：$328
短短的小背心露出小蠻腰，最適合炎炎夏日，絲巾和背心上的橫紋縱橫交叠很有後現代感。
幾歲起就跟母親在花園街打滾尋寶，眼見花園街從舊日的出口店，變成現在幾乎清一色的扮韓風深圳貨，越難購得心頭好。在旺角區宜買單色、間條等basic style日常服飾，數十元一件已能找到全棉好質量的。至於下身裙褲，我會重點在出口店裏找一些上乘剪裁的牛仔褲，如今次找到今年最流行的喇叭褲，一條是日本版的Gap，另一條是日本品牌Westwood Outfitters，兩者比專櫃價錢平一半，絕非一般數十元貨色能相比。
另類選擇：$638
繼續露腰和草帽風格，襯個今年大熱的全身牛去picnic，fit晒！
記者Afa 文青田園風
身價：$125
吸汗透氣，這一身裝扮最適合去耕田，輕身又舒適，係我嘅style。
家住旺角，所以我名副其實是MK妹。由於旺角買衫實在太方便了，養成了慵懶個性，不假外求，尤其愛逛性價比高的旺角中心。平心而論，旺中衣飾，多為大陸三線產品，質料、車工等難與大品牌相提並論，但旺中割喉式的售價，實在是抵！個人會先上三樓，貪其租金較平，成本再低些，貨品更價廉物美。如果耐心一點逛，某些暗角小店，還有一些質量不錯的貨色呢！
另類選擇：$150
除咗耕田，文青仲愛野餐，將成塊野餐布一樣的連身裙着上身，感覺就會好田園。
記者Sherry 搖滾英倫風
身價：$229
全黑造型夠cool，以oversize tee加窄身牛仔褲，望落身形更纖瘦，加對boots就化身為英倫rock妹。
旺角買衫我會選擇較挺身及質料較厚款式，看上去不會太廉價，亦不易變形。熱愛英倫樂隊，多數會買一件key item如band tee、恤衫，將焦點放於一件單品上，再購買廉價牛仔褲作配搭。建議各位在旺角購買恤衫，一定要越簡單越好，因為越多細緻位，越容易暴露劣等車工。平買牛仔褲要點在於選擇有彈性的布料，因為大多店舖不設試身，彈性布料較保險，亦較貼腳，較能修飾腿部線條。
另類選擇：$270
夏天都係揀多套tee搭熱褲的造型，褲越短腿越長，加件軍look款恤衫，記得roll袖，遮到手臂又有型。
花月薪十分一買衫
訪問過身邊朋友仔，他們都不是經常買衫，每月平均花費月入的十分之一，除工作需要或找特別item外，都偏向選幾百元甚至更便宜的，感覺他們在買衫方面都算節儉。
Kristy（28歲）網頁設計師
「要交租又要儲錢結婚，不過都鍾意買衫，所以會揀平嘢或透過網上集運購物，慳得就慳啦！」
月入：$17,000-$20,000
支出：$8,000住宿、$1,000衣飾、$3,000 家用、餘款：儲蓄
阿穎（30歲）廣告製片
「喜歡古着，每件百至千位不等，但不是每月買，多數上網找可以退款的，唔啱都唔會蝕。」
月入：$15,000-$18,000
支出：$5,000住宿、$1,000衣飾、$5,000家用、餘款：消閒
Erica（29歲）酒店傳訊經理
「沒有太大經濟負擔，會把錢儲起去旅遊。上班服會買貴一點，但便服就幾平都沒有所謂。」
月入：$25,000-$30,000
支出：$3,000衣飾、$4,000家用、餘款：消閒
Mike 髮型師
「我喜歡電單車，經常留意和電單車有關的服飾，但香港沒有太多這類產品，會去日本、台灣等地搜羅。」
月入：$25,000-$30,000
支出：3,000衣飾、$3,000家用、餘款：消閒
Ronald IT顧問
「我對上班服有要求，堅持穿全套西裝，每套三至六千元不等；多花費在影音和消遣上，每月約五分一。」
月入：約$60,000
支出：$5,000衣飾、$20,000儲蓄、$3,000 影音、餘款：消閒
記者：容慧心、陳芷慧、彭海燕、楊麗珊
攝影：許先煜、梁志永、潘志恆
編輯：黃仲兒
美術：吳子豪