你冇睇錯，星座咁浪漫嘅題材，係真係會喺財經版呢啲充滿銅臭味嘅版面睇到。話我迷信？唓～自古燈神出股壇，明明只有往績參考冇實質證據支持，咁你又信燈信邪？
星座講性格，睇完當參考，講得你個星座好嘅，恭喜你；講得你唔好，但你話我知你係股神嘅，我畀個叻你！講多次，性格可以左右命運，但唔可以決定命運。有心有力夠勤力，用500蚊炒股都可以炒到上太空，學新技能後繼續為自己個倉跑數。
白羊座（3月21日－4月19日）
你頭先去食碗麵，對面坐咗位陳師奶隻手係咁撳手機，你每食1啖，你對眼嘅視線都要望住佢手機mon，你嘗試食多3啖，但係你真係堅持唔到啦，你宣佈投降拎起電話。
事源你偷睇到到陳師奶手機收到個message，「iBank朋友話9394一定爆升」，作為純情又衝動嘅白羊仔，呢個時候諗都唔諗，拎起電話，眼神堅定，「喂？幫我入9394一球，現價掃佢。」
第二日一開市，白羊仔充滿希望地用手機開《蘋果投資王》睇9394報價，跌咗半成，你二話不說，拎起電話：「喂，幫我沽晒9394，快！」
最後，9394當日升兩成收市。呢隻白羊，簡直係羊牯嘅典範。
咁我又唔係話白羊唔識炒（戴定頭盔），只係白羊一般比較衝動，冇耐性，要白羊長揸，佢又偏鍾意短炒。心理質素相對差，Which is炒股大忌。所以如果有白羊仔發現自己係燈，一係你改咗自己性格，一係「及早離開」。
金牛座（4月20日－5月20日）
「聽陳師奶話阿朱太講，9394會爆升」師奶甲口痕講咗呢句嘢。出名穩陣兼貪錢嘅金牛仔，聽到疑似有錢執，對眼閃一閃：「點解會升？公司有咩業務？業績係點？…Blar blar blar…」師奶甲聽到佢問啲咁深嘅問題，眼神一縮，問到個心都慌埋，「唓…鬼知咩，有錢執就得啦。」然後絕塵而去。
金牛仔呢個時間返屋企，係咁拜訪Google大神，又喺《蘋果投資王》睇隻股舊新聞，研究股價走勢，終於，有一日，佢拎起電話，電視同時傳出自己把聲「喂？大師呀，我想問9394入唔入得過呀？」
經過一番研究，佢終於喺三日後捕捉一個絕佳時機，先掃一注，過兩日確認升勢，再掃！過咗年幾兩年，甚至3、4、5、6年，隻股已翻十番。金牛係有能力，由幾蚊貨，揸隻股到百幾二百蚊都未放嘅能耐。
金牛呢個名真係起得好，起得妙，金牛炒股，個倉更易牛。事關金牛座出名穩陣有耐性，唔單止會做功課，同時重視長線投資價值，個市幾Chok都好，都唔會發茅淆底，係心理質素極佳嘅星座之一。
雙子座（5月21日－6月21日）
「聽陳師奶話阿朱太講，9394會爆升」師奶甲口痕講咗呢句嘢。雙子座聽到，先施施然飲一啖橙汁，繼續唔出聲，師奶甲繼續，「好似話會炒到上10蚊呀。你買唔買呀？」雙子食一啖蛋糕後，終於開金口，「我冇心情，唔買了。」
第二日，雙子起身，突然覺得呢個世界唔炒股冇發達，佢焦急地拎起電話，「幫我買9394，9354，9314，各掃十萬股」「但今日大跌市，真係衝？」「衝！」
雙子座，係一個非常人格分裂嘅星座，好率性，好隨心，心情好就算大跌市都掃，一買買幾隻；心情唔好就算明知大升市，都一股唔買，甚至係明知要沽貨，輸錢？I don't ＿＿care！冇mood沽貨。性格太飄忽，一時一樣，又係炒股大忌。
巨蟹座（6月22日－7月22日）
「聽陳師奶話阿朱太講，9394會爆升」師奶甲口痕講咗呢句嘢。巨蟹仔即時開《蘋果投資王》睇睇隻股，講咗句，「吓，炒妖股，好危險呀！」「車，你咁驚，去買盈富基金（2800）啦！」「都好！基金穩陣呀！」
如是者，巨蟹仔研究咗一輪盈富基金後（係，冇錯，連盈富基金都要研究），佢終於買入一手。然後佢就開此對報價機上癮，一開市，睇報價，2分鐘後，又F5，再2分鐘，再F5，撳到個F5都要爆了！
本來隻股都冇咩上落，點知，呢個時候「OMG！佢跌咗1蚊呀，點算好點算好！」於是，佢決定，沽貨，當堂心安理得開心晒。
巨蟹名副其實係一個好驚會做蟹嘅星座，短炒「神仙股」？NO！上落咁大，心理負荷唔到隨時升仙。隻股升幾格咩？有食唔食，罪大惡極，盈利袋住先。如果跌落嚟，蟹仔淆晒底。巨蟹既然唔敢take risk，好多時寧願將錢買基金，甚至就咁放喺銀行就算。投資？唔玩咁多啦。
獅子座（7月23日－8月22日）
「聽陳師奶話阿朱太講，9394會爆升」師奶甲口痕講咗呢句嘢。獅子仔開《蘋果投資王》睇睇個圖，思考咗一陣，「我覺得隻嘢唔得囉。我唔理你啦，我買1234。」
兩日後，師奶甲又口痕，沾沾自喜咁話「你隻1234好似輸好多。」「唓，咪當交學費囉。」然後高高興興去買另一隻。
獅子座極度有自信，話知你number有幾準，總之信自己分析才是真理。唔怕死，更加唔怕輸！輸咗咩？So what！下一隻實得嘅！希望在明天呀嘛。
處女座（8月23日－9月22日）
「嘩！今日隻9394，升到2蚊呀」「哼，我5毫子就入咗10萬股啦！」公司同事，因為一隻9394，就喺度認屎認屁。呢個時候，處女座嘅你，就好似張五常句名句一樣，「笑而不語」，因為你3毫子入咗一球。
「嘩！今日隻1234，跌咗兩成！」「唉！我蠢咗啦，早知我一早沽咗佢啦。」公司同事，又因為隻1234，喺度嘈喧巴閉。呢個時候，處女座嘅你，沉着應戰，仔細考慮後決定止蝕離場，然後反省今次點解會輸。
處女座係典型完美主義，凡事追求極致，即係「養兒谷佢入喇沙，買股諗過先會揸」。有耐性，勝不驕，敗不餒，懂得華麗轉身，務實之餘又好學，會用腦諗過度過，真係經過那些年後，炒股成績越來越好。代表人物係，股神畢菲特。
其餘6個星座，明日再續。
千頌C
http://fb.com/winbigwok
本欄隔周三刊登