A股行情獨步全球，外人好難睇得明，投資界搵食就需要好多獨門秘笈。例如內地券商報告，經常會用到一個名詞「豬周期」，來判斷後市。簡單嚟講，豬肉價格係股市的領先指標，過去二十年來，幾乎鋪鋪靈驗。所以內地有種講法，A股唔係牛市或熊市，而係豬市！
如2007年9月豬肉價見頂，A股大冧。原因係豬肉價能反映通脹程度，豬肉價升，阿爺要收水，最終拖累股市。內地數據經常造假，但豬肉價一目了然，可信度遠大過官方CPI。
今次牛市亦不例外，內地豬肉價下半年開始下跌，中央一直放水，造就呢輪大牛市。不過，今年3月起，豬肉價已經終止之前9個月跌勢，轉為上升，正式進入新一輪豬周期。昨日統計局公佈5月豬肉價又升5.3%，再升落去，牛市恐怕就快玩完。
黃尹華