香港三項鐵人總會每年6月會喺沙田科學園搞鐵人比賽，不過今年嘅三項鐵人就剩番「兩鐵」，取消咗單車項目，得番游水同跑步。有啱啱喺周日比賽完嘅參賽者，引述工作人員話係因天賦海灣啲住客怕嘈。
八方問過運輸署，署方話去年起收到居民投訴，話封路搞活動影響佢哋出入同造成滋擾，三項鐵人總會今年1月提出封路申請，但地區諮詢上有居民反對，所以總會決定取消申請。總會就話，由2008年起就喺科學園同白石角一帶搞三項鐵人賽，今年係首次拎唔到封路許可取消單車項目，下年會唔會改場地就未知。有參賽者話屋苑唔少單位仲未裝修，而且路線其實唔會經過屋苑，只係影響部份行車線，咁都有人投訴，我哋真係識條鐵咩？