傳媒同公關公司一樣，都係人手流失率高嘅行業，所以公關公司人手氹氹轉係尋常事，不過世事無絕對，行內有間公司情況相反，流失率長年低於10%，據講高層5年來一個都冇走過，呢間公司就係萬博宣偉（Weber Shandwick）。行內《Marketing》雜誌，上星期再次選出萬博為年度最佳公關公司，今次已經係過去5年第3次獲此殊榮。
八方聽聞萬博生意幾好，過去幾年，每年收入以雙位數上升，搵到錢，公司除咗提供生果、靚湯，仲有師傅幫員工按摩，鬆弛神經，董事總經理徐偉斌話呀，佢哋客戶貴精不貴多，最強調要同客戶建立深厚關係，萬博最近登咗個廣告，以天鵝做主題（圖），話希望同員工、客戶有長久關係，生意長做長有，邊個唔想吖？