南韓自中東傳入咗中東呼吸綜合症，英文簡稱MERS即是Middle East Respiratory Syndrome之縮寫，又俗稱「新沙士」，中國沙士權威鍾南山話新沙士無特效藥醫，染上咗都幾得人驚。但世界衞生組織到目前為止，仲係講MERS不易人傳人，對南韓隱瞞疫情，不予重視，如果真係咁，南韓做乜已有千五、六人因疑受感染而隔離，且有日益擴大現象？世衞總幹事陳馮富珍班手下唔通胸有成竹，知道新沙士與「非典型肺炎」差好遠？
南韓人又唔守隔離規律，染病醫生竟然周圍交際，直接間接害人，充份暴露南韓雖然聲稱係科技大國，佢嘅國民文化還是與日本人有一大段距離。一位在美國讀中學與大學嘅世姪同左丁山講，佢留美多年，當時仲唔係有好多中國學生，比較見得多嘅就係韓國學生與僑民，以佢所見所聞，不少韓人成日隨街吐痰，甚不衞生，令美國白人不滿、日本人鄙視。有此印象，呢位世姪在韓風日盛之下，還是不願到首爾一遊。
風頭火勢，未來幾個月都係不去南韓為妙，今個暑假，香港人逼爆日台泰都似。前兩日碰到「縱橫遊」太子爺袁振寧，順便問吓佢點解「縱橫遊」肯自動取消24團韓國遊？退還全數已付團費，究竟有冇損失呀？袁公子話損失梗係有，只希望酒店、飛機公司、旅遊巴士等等可以體念多年生意往來，唔好收足預付款，肯退番一啲「退團費」畀縱橫遊，以減少損失，佢地公司係因為好多顧客驚咗南韓新沙士，當時即使未有旅遊警示仍然希望退團退款，故此索性取消咗24個旅遊團，至於其他旅行社點樣處理，不在考慮之列。旅遊業議會講，自6月5日起，有460個香港旅行團（7600名遊客）陸續出發去南韓，希望呢啲旅客十分小心及幸運（按：昨日政府宣布紅色旅遊警示，六月韓國旅行團全停）。袁公子又提醒日本旅行團因日本方面大幅度提高酒店房租，旅遊巴士日租，旅行團成本急增，不得不調高團費，抵銷日圓貶值帶來嘅好處。日本自2011年311地震海嘯核電洩漏之後，旅遊業曾一度陷入困境，不少業界關門退休，但安倍上台後，大力推動日圓貶值，加上強國人愛上日本，於是旅遊業急速反彈，就造成今天人手不足，旅巴短缺嘅情況，令旅行社頭都大晒。去日本旅行，自由行方式可能較為便宜一啲！