隔牆有耳：維港渡海泳增500名額 - 李八方

維港渡海泳復辦後今年嚟到第五屆，10月18日舉行，由鯉魚門三家村公眾碼頭落水，游到鰂魚涌公園公眾碼頭上岸，全長1.5公里。今屆參賽名額由2,000個增至2,500個，其中競賽組同優悠組分別增至600及1,900名額，亦新增學校組及慈善組。

香港業餘游泳總會義務秘書趙展鴻話，留意到去年部份參賽者落水前掛住影相同打招呼，搞到遲落水有啲混亂，今年會安排參賽者盡快落水。新沙士肆虐，趙展鴻卻唔太擔心，始終賽事半年後先舉行，相信疫情會受控制，如果到時真係好嚴重，就會延期或取消。
中四學生周盛夏參加咗4年渡海泳，去年勝出競賽組12至16歲組別亞軍，期望今年奪冠。