「米粉」要留意嘞，香港首間「小米之家」將於下周一正式開張，噚日率先開放畀傳媒參觀，聞說創辦人雷軍有諗過來港，可惜噚日都係no show，下周一又冇開幕儀式，睇嚟米粉都好難見雷軍一面。
小米之家位於旺角荷李活商業中心高層單位，面積唔大，只得270方呎，除咗可以買機殼、小米頭戴式耳機等配件外，用戶亦可預約維修手機，或試玩仍未在港發售嘅小米新產品。
講起新產品，呢間小米之家幾有趣，竟然冇乜新機賣，小米Note同埋小米4i等熱門手機都冇同步發售，店內擺放嘅小米4i，只供用戶試用，換言之，小米4i仍要定時定候喺官網鬥快搶，而更高階嘅小米Note，發售日遙遙無期。
小米香港話，已經向北京總公司申請取貨，但暫時未有任何消息。