哇，超過2,000人逼爆機場，一擁而上圍住目標座駕，又舉晒「你是我的男神」嘅標語，再嚟全場大合唱，最後哭泣道別……邊位明星咁巴閉？原來係「六四」俾廣州恒大解除教練職務嘅簡拿華路。雖然「大簡」只係教咗212日就慘食無情雞，但就勝在贏盡球員同粉絲嘅歡心。
IG用中文感動告別
前晚佢取道廣州白雲機場飛去杜拜，引嚟2,000個球迷送機（上圖），仲高歌一曲譚校長嘅《講不出再見》，場面墟冚；逼到要企上登機櫃枱嘅大簡未必聽得明咩係「要走一刻請不必諸多眷戀」，但佢貫徹瀟灑作風，只係眼紅紅、笑笑口咁講咗句：「我永遠唔會忘記你哋。有機會我會再嚟廣州……謝謝。」就咁揮別羊城。睇番大簡instagram，見佢上載咗六張當晚嘅片同相，仲有張中文感言話會帶住微笑到來、帶住微笑離開（下圖），因為同呢班真男人（恒大球員）一齊並肩作戰過，難怪全隊上下都咁捨不得你！
識睇，一定係睇足英台【英波Live】：
http://soccer.appledaily.com
http://bit.ly/engballlive