華麗轉身。球場變水塘，一個施丹急停，轉身就會成為港版東方之星，陰溝裏翻船！飲慣東江水的香港仔，早已不是蜑家仔，翻艇後翻身無望，阿爺會在黃金72小時後，得力施救，扶正翻艇，盤點屍骸。默哀，腰斬賽事，講完。
搬龍門。龍門不是尾門，五百萬白票難守，就算是紐亞和保方合體，也難敵阿爺的掃把腳搭上帝之手。搬龍門後，入球計唔計？唔使問FIFA，姓周的搶住大喊「我方入了121萬球！」
無人是輸家。京腔分析，跟誠哥的「人人是輸家」唱反調。專吹黑哨的雞鴨鵝三人組贏幾多球？比本土派更狠秘擲肖友懷婆孫返大陸的工聯會斷了幾多波纜？球迷一人拿一張票，但埋到場邊入口才被告知，張票是假嘢。我要真門票，我要反假波！
優化。深圳五洲賓館開完房後，優化被「長期有效」取代。球會點優化？靠銀彈撬球星！泛民轉會有價，三億想撬走泛民MSN？將五千萬做住定期的梁振英，忍唔住笑了。