康健國際（3886）創辦人曹貴子越來越富貴，由沙田一名兒科醫生，做到炒賣殼股嘅股壇活躍分子，好快仲做埋馬主㖭喇。
馬會噚日公佈新一年中籤買馬名單，曹貴子榜上有名，佢將會夾埋陳達華、郭純恬同林茂一齊買馬。佢哋4人有一個共通點，就係歷屆或現屆仁愛堂總理，曹貴子與郭純恬𠵱家分別係仁愛堂副主席同總理。
郭純恬亦曾做過上市公司董事，係康宏（1019）執董，舊年離職，咁啱得咁蹺，康宏近年引入康健做股東。不過商業社會人與人之間嘅關係就係咁千絲萬縷。
股壇盛傳曹貴子十分吃得開，跟金利豐（1031）老闆娘朱李月華（朱太）、位元堂（897）主席鄧清河，仲有「玩具大王」蔡志明好老友，朱太、蔡志明都有玩吓馬仔，曹貴子將來做埋馬主就更多話題了。