港股進入大時代，券商亦加快擴充。靚仔股評人鄧聲興早前過檔君陽證券，君陽證券喺金鐘力寶租多一個寫字樓擴充，噚日開張，同鄧聲興老友嘅金利豐（1031）老闆娘朱李月華（朱太）畀面到賀，齊齊切燒豬。
朱太呢輪確係心情靚，淨係避過數字王國（547）暴瀉一劫已經夠開心。當炒嘅數字王國早前跌到七個一皮，但據聯交所資料，朱太喺隻股跌之前已悉數減持。問番佢呢件事，朱太先反問：「𠵱家佢咩價？」繼而解釋，佢哋同數字王國做咗一筆股權抵押貸款，所以喺聯交所先見到佢哋持有數字王國。佢認為對方「基本因素OK」，但覺得自己好運，喺公司股價急跌前完成貸款收番條數。
除咗朱太，長和（001）兩位公關阿姐Wendy與Winnie噚日都有到賀。鄧聲興話，之前參加過好多次長和系嘅投資者會議，同Winnie佢哋好熟，所以今次新場開張，佢哋都到場支持。