4間大學學生會早前喺支聯會六四燭光集會中焚燒《基本法》，公務員事務局前局長王永平（圖）都好關注喎，佢噚日喺報章專欄，質疑行動除咗宣洩情緒，有乜積極意義？
王永平又話每年參與六四晚會嘅人士絕大多數係嚟悼念遇難者，想提醒當權者唔應該抹掉呢段不義歷史，批評事前未經討論就即場加插燒《基本法》係唔尊重參與者，希望支聯會清楚表明，以後六四集會係咪仲有焚燒《基本法》環節先？
八方問過支聯會副主席蔡耀昌，佢話支記年年都邀請學聯上台發言，象徵學運傳承，今年學聯唔以組織名義參與，改為請4個學生會代表，而支記唔會審查參加者發言嘅內容同方式，重申燒基本法唔係大會安排嘅環節，亦唔代表支記立場。
但蔡耀昌又話，當然希望參加者發言時考慮到大會主題，嚟緊支記亦會開會檢討今年六四活動嘅安排同市民反應。