不丹聽晚八點會喺旺角場嘅世盃外C組分組賽作客港足，呢隊被國足暗寸業餘嘅「快樂小國」，噚日抵港後即刻閉門操個半鐘，盡顯專業之餘，陣中被譽為「不丹C朗」嘅辰卓堅讚（Chencho Gyeltshen），仲信心爆棚話要領軍砌低港足㖭！
不丹對於大部份香港人嚟講，除咗係快樂國家、同埋藝人梁朝偉同劉嘉玲結婚嘅地方外，其餘嘅嘢應該所知不多，呢支神秘之師噚日喺泰國集訓完後嚟到香港，仲要繼續保持神秘，選擇喺將軍澳運動場閉門操練。
我求大俠窺探過佢哋練波，「搓馬騮」、分組練習賽，操足個半鐘，絕無hea操。之但係梳晒蛋撻頭、兼有「不丹C朗」之稱嘅19歲前鋒辰卓堅讚，就未有練到佢個扮C朗射罰球嘅A字形站姿，所以睇唔到呢位A貨C朗嘅射術有幾勁！
不丹射手認抄足C朗
但可以肯定嘅係，呢位曾經喺泰超武里南聯跟操嘅A貨C朗，同正牌一樣信心爆棚，佢仲豪言要領軍贏港足㖭︰「C朗係世界最佳嘅球星，有型又好波，我的確受佢啟發，模仿佢嘅踢波風格。雖然我冇佢咁快，但作為前鋒，當然希望對每隊都有波入，嚟到香港就要付出100%，爭取贏波！」
正職係飛機師嘅隊長嘅卡馬卓斯寧亦有同感，「足球嘅嘢冇人預計到，嚟到香港就要搏盡。」對於國足海報暗寸佢哋，踢完波要揸飛機嘅「Captain卡馬」就話冇留意︰「如果不丹以前有職業足球，我一定會揀足球，但（航空）公司都好體諒我，一星期可以練三日波；而我哋亦的確係同組嘅underdog，如今殺入世盃外次圈已有好大進步，最緊要係吸取經驗。」
客軍教練嫌香港悶熱
至於不丹嘅日籍教練築舘範男，就話識港足新任日籍體能教練池田誠剛。但問佢會唔會向對方攞料，佢就問非所答，淨係話香港天氣好熱喎。佢仲話賽前球隊唔會出外觀光，只會集中精神應戰咁話。對手有備而嚟，東道主港足亦唔敢怠慢，噚日喺小西灣運動場操練時，教練金判坤仍然話有信心全取三分。
識睇，一定係睇足英台【英波Live】：
http://soccer.appledaily.com
http://bit.ly/engballlive