【鳩嗚乜乜乜】
賣糭睇怕幾好賺，石硤尾南山邨嘅「嘉湖」賣手工糭66年，一直都好多捧場客，除咗尊貴嘅前政務司司長陳四萬，仲有費清自稱平民嘅同事光哥。佢每年都有訂，今年就叉叉聲，皆因嘉湖糭勁加價。
佢有留起舊年嘅訂貨價單，同新單比較之下，最平嘅豬油豆沙糭，舊年$40，今年$43，加得唔算好多。但係，蛋黃鮮肉糭（圖），就$43加$5，到$48；火腿鮮肉糭都好厲害，加$10去到$65，至於蛋黃腩肉糭，最誇張，由$60加價25%到$75，足足加咗$15！！！今年仲新加咗一款雙黃腩肉糭，賣成$85㖭！！！光哥話要訂畀親友，都成過千蚊㗎。不過，手工糭仍然有價有市，嘉湖負責人區偉剛話，由於材料費不斷上升，今年嘉湖糭要加價，但上月底仍然接到唔少定單，「舊客啲單返得七七八八」。店舖𠵱家只接少量新單，佢哋呢一兩日已經開始包糭，去到端午節當日仲要預備幾百隻糭應市。
嘉湖糭以上海糭為主，仲強調連豆沙糭嘅豆沙，啲豆都係自己除殼、自己炒，保留幾十年前嘅味道，但如果連價錢都「懷舊」就仲好。
費清
＃要生計，也要生活 ＃毋忘初衷