晨訊科技（2000）今年頭四個月收入數據，靚仔到痹，主打手機同無線通訊解決方案入晒直路，已經有得博半年盈喜，而新增機械人瓣數，食住祖國大需求，晨訊掂過碌蔗。
機器人概念值博
晨訊由2013年大出血2.5億元，到上年大翻身賺3,415萬基礎下，集團啱公佈上個月數據，收入增加26%到1.95億元。而今年1月到3月，晨訊每月收入同比增幅，亦上到34%、55%同15%。再講，晨訊收入增加，係嚟自銷售手機及解決方案、無線模塊等等主打瓣數，唔係好似上年咁，部份係嚟自物業銷售。數據靚仔之餘，亦實淨到爆，主打瓣數上正軌，入直路，嚟緊半年成績單，已經有得叫糊炒盈喜。
仲未止，除咗內聯網，晨訊亦新拓機器人智能製造業。喺勞動成本高企下，自動化已經係趨勢，而工信部賽迪研究院數據，呢瓣產業，喺2012到2022年間，年均增長率達到23%至36%。至於祖國主要製造業省市，單係一個浙江省，當中3.6萬規模以上工業企業，爭取喺2017年全面完成機器換人，所講每年投入資金，係唔少過3,750億港元。晨訊食住大勢上，呢瓣業務爆炸力，唔講得笑。
晨訊現價（0.62元）挨近八年底，比起2007年高位2.85元，仲講緊累跌78%，得0.8倍PB，集團最高PB係2005年8.8倍，上市以嚟平均PB喺1.9倍。再睇亞洲區，日本炒到甩晒轆機械人股Fanuc，市值高達6萬億日圓，折約3,883億港元，係晨訊16億元市值240倍樓上，講緊3倍PB、祖國機器人（300024）36倍、藍英（300293）14倍，晨訊平咗大截！買訊晨，博半年盈喜，當翻半番到0.92元計數，PB先1.2倍，未有耐上到本身平均水位，更未有耐追到行家。
錢雋
細價股專家
本欄逢周一、三、五刊出