俗語有云：「錯要認、打要企定」，季初小弟幾個推測都大跌眼鏡，未知你會否也與我跌破同一副眼鏡？先是蘇亞雷斯（圖）的空前成功。季前我與巴塞名宿史岱哲哥夫「一般見識」（係呀！係要拉埋啲勁人落水），認為巴塞放棄阿歷斯山齊士，購入停賽到10月的阿蘇不明智。但事實證明，阿蘇的精湛射術、技術和合作精神，確是沒有不適合加盟的球隊；加上他變相遲兩個月開「咧」，冥冥中可能反成巴塞季尾攻力仍可保高峯的原因。
第二是祖雲達斯，其實不只我，甚至意國球壇季前也不睇好艾基利執教祖記。一來他帶領AC贏得的那屆意甲冠軍，正值國米奪三冠王後摩佬走人、老闆收水；祖記又元氣未復，才令他冷手執個熱煎堆。之後幾季亦見其執教功力見底、無力與復蘇的祖記周旋。今季繼承干地雄厚班底，加上米蘭雙雄積弱、拿玻里及羅馬不穩，再奪意甲本屬「基本消費」；但能贏埋意大利盃、歐聯四強淘汰皇馬，雖然最終決賽「合理地」輸給巴塞，也要改口寫個「服」字畀艾基利。
講到跌眼鏡，上周末法網決賽肯定亦有大批球迷跌碎晒！上次華域加贏澳網，可能有人會話：「多得拿度受傷咋！」但今屆奪法網冠軍，絕對是實力表現。連同上年美網盟主施歷，大滿貫已不再由四大天王壟斷。觀眾多啲眼鏡碎，會否代表網壇百花齊放，係好事也說不定？
方栢翹
now足球評述員