香港人成日批評強國同胞唔文明，喺港鐵車廂內進食，不過，八方都見過唔少香港人，趕時間嗰時都會忍唔住喺車廂內「偷食」。學民思潮召集人黃之鋒噚日就俾人影到，佢喺車廂內邊睇電話邊食包（圖），「時聞香港」facebook專頁上貼完文就留言：「大話精黃之鋒講一套做一套，明知故犯在港鐵車廂內食嘢！」獲唔少網民留言附和兼諷刺，包括有人嘲諷：「人哋公民抗命緊，咪阻X著（住）人啦」。
網民群情洶湧，之鋒都知道自己唔啱，喺facebook道歉，承認自己喺車廂內進食，「不應推搪和找藉口，錯了就是錯了，黃之鋒在此公開道歉，永無下次」。網民就留言食花生兼抽吓水，例如有人梁振英上身話，喺港鐵食包呢個問題，查實都係源於土地不足啫。