近三季六月共跑過五次谷戰，每次都有方廐馬勝出，共取8冠11位，因此季尾谷草不捧方廐馬，無異於剝削了自己的贏錢機會。上周三谷草夜賽，方嘉柏充份展示其馬房的六月份谷草威力，豪奪三冠一位，憑「威百利」、「光速銀桂」及「御綵」中三元兼捧盃，今期出馬依然份量十足，當中「上進」及「御綵」分別以新上名馬身份出戰谷草勝途，可期雙雙報捷。
第四場「上進」二月尾由柏寶贏四班谷草一哩開齋，之後一直無表現，上仗卻於田草1800米突如其來，火併「友誼大使」取得大冷Q腳，顯示狀態回勇。今次趁勇復戰贏馬的四班谷草一哩，未跑已充滿進取心，對手不算太強，有力建功。
第八場「御綵」一周前由柏寶贏谷草三班1000米開齋，當時負133頂磅後發先至，難度不低，賽後只加六分，當起馬較易消化評分增幅，相隔七日匆匆再戰，查今季方廐兩匹剛上名馬匆出跑谷草均繼續有表現，「御綵」咁快又跑，擺明想添食。