公民黨湯家驊噚日另起爐灶成立智庫「民主思路」，智庫暫時唯一受薪嘅總幹事由袁彌昌Derek出任，而佢妹妹就係前港姐、人民力量主席袁彌明Erica。雖則哥哥係溫和民主派，但身為激進民主派大旗手嘅Erica話，兩兄妹有時都會討論政治，但未試過因為政見唔同而鬧交反面，「佢認為談判重要，我就同佢講，同共產黨談判真係嘥氣」，但佢話喎，其實激進民主派同進步民主派，「冇乜好拗」箒。
Derek同八方講，已經同Erica單聲埋咗湯家驊堆，身體力行話畀阿妹知，佢阿哥仲係一個民主派。點解咁講？Erica解畫，話皆因佢阿哥啲文章被建制派引用，搞到面目模糊。有記者覺得Derek同Erica個樣唔係太似，Erica就唔同意：「其實我哋兩個似樣㗎，都似爸爸，我哋隻眼係最似樣。」大家睇相又覺得似唔似？