日本導演佐藤純彌喺76年拍攝，由高倉健同中野良子主演嘅《追捕》，部戲當時喺內地上映時，反應好好，𠵱家吳宇森計劃重拍，準備搵金城武做男主角，預計10月喺韓國開鏡。兩個禮拜前，吳宇森仲同陳慶嘉一齊去咗首爾睇景，當時兩位導演都未意識到新沙士已經喺韓國大規模爆發，到佢哋返咗嚟香港後先至知道咁大鑊，同行嘅寰亞電影部高層劉艷娥仲唔舒服，佢入醫院檢查時，院方一度好緊張，後來證實只係腸胃炎。
大導老婆幫口勸
不過，寰亞電影評估過去首爾拍外景風險後，已數度向吳宇森提出取消去首爾拍戲，因為睇韓國政府現時嘅處理手法，完全睇唔到疫情已經受控制，所以到秋天嗰陣，疫情有可能會更嚴重，為咗工作人員安全，最好都係轉地方拍啦！聽講吳宇森老婆都覺得新沙士疫情唔講得笑，都有勸老公唔好博，所以佢哋𠵱家諗緊，係咪轉去台灣拍攝。
撰文：馮仁昭