包括發言人黃子悅在內嘅學民成員周日去到各區開檔宣傳反對袋住先，受到警察諸多刁難，學民facebook貼咗張相，見到兩名便衣女警惡形惡相對住黃子悅。
黃子悅喺fb撰文現身說法，話當日十幾名學民成員喺粉嶺火車站外天橋擺檔，晏晝有十幾個便衣、冇掛住委任證嘅警察圍住街站要求抄身份證，黃反駁過去只有街站負責人被抄喎，但有女警稱「今時不同往日」，幾經爭取先令只有佢被抄低身份證，但警員隨即拎錄影機攝錄街站情況，又跟住學民成員到火車站。
黃子悅批評警方做法不可接受，希望檢討警員唔戴委任證做法，請警方要求市民出示身份證畀合理理由，「不要因為我們是學生，就恃強凌弱」，質疑使乜出動反黑對待學生。
八方就黃子悅嘅質疑向警方查詢，發言人回應，當有公眾活動舉行，警方有需要時會要求有關人士出示身份證明文件，以核實身份，並會登記有關資料作記錄。