警隊有成二萬幾人，當中不乏靚靚警花同靚仔阿Sir，好似噚日負責印尼女露宿者橫屍旺角街頭案件嘅西九龍總區刑事總部署理總督察盧宗旺，梳型個頭見傳媒，黑黑地有幾分陽光味，激似香港先生翟威廉，加上中英文皆流利，令唔少女士眼前一亮兼冧爆。
盧Sir噚日喺旺角女屍現場同記者交代案情，八方唔少女同事睇直播睇到嘩嘩聲，大讚呢位盧Sir好靚仔；有網民亦同八方同事一樣識貨，開post大讚盧Sir嗒得杯落，據知唔少人聽到盧Sir以一口流利標準英語回答記者提問時，即時增添幾分好感，成功俘虜女士芳心。
八方向警隊老友打探兼人肉搜尋後發現，洋名Bert嘅盧Sir約30出頭，最少有7至8年嘅警齡，其實今次唔係盧Sir首次見傳媒，但過去呢位警星未被發掘。據知佢過去幾年駐守過油尖警區反黑組，曾經破過多宗黑社會勒索案同擄劫案，現為西九龍重案組第二隊主管嘅佢去年更偵破一宗綁架案，成功救回3歲女肉參及拘捕綁匪。
名草有主 已為人父
有一項消息，女士們要失望嘞，八方聽聞盧Sir已經名草有主，仲係3個小朋友嘅爸爸嘞。
立法會就快表決政改方案，好多人擔心佔中會否重來，有網民話，若果再爆發佔中，除咗搵「4點鐘許Sir」，警隊應該考慮搵盧Sir日日出嚟開記者會，一定贏取唔少女士支持。
李八方
mailto:[email protected]
