雷神繼續停賽，而潘頓因體重問題，總有些場合冇馬騎。今期(10日)快活谷夜賽，似乎變成韋達的世界，他是唯一跑足八場的騎師，而且座騎分量十足，睇嚟騎師王彩池捧佢場，真係實食冇黐牙。
話韋達啲馬夠惡，絕對唔係亂噏，「按一按」、「金龍」、「巴基小子」、「叻陶寶」、「駿將」及「開心神駒」上場全部非勝即位，近況有保證，餘下兩匹「進攻足球」及「靚橙」上場亦跑第五唔差，尤其「靚橙」，4月上旬曾擊敗惡馬「紅白」贏馬，「紅白」跟住兩仗取一冠一季，「靚橙」今場喺四班孭輕磅排2檔，當然佔盡上風。
韋達今朝(8日)亦有搏殺動靜，佢同「巴基小子」、「進攻足球」嘅練馬師告東尼傾咗好耐，擺出搏殺格。其中「巴基小子」近三仗兩勝同程谷草1200米，正值大熟大勇，4歲馬仲有進步空間，隨時贏到你唔信。
仲有「叻陶寶」，今朝韋達操完，廐主沈集成一早喺機坪等候，騎練一齊睇馬，神情認真，盡露爭連捷決心。「叻陶寶」上次由雷神贏得清脆利落，難得雷神停賽韋達先有機會接手，梗係唔同你客氣，食咗先講啦！