大家應該仲記得，上月某朝一覺醒來落街返工，竟然發現身邊有條「假普選真呃人」嘅黃色banner，代替咖啡幫大家一朝早提神。原來當日呢批banner係公務員同公營機構員工，漏夜出動喺各區掛上㗎。
雖則呢批banner，其後好快被政府拆晒，但黃絲公僕噚日凌晨又出動，喺各區掛上「向假普選說不」黃色banner。發起人K向八方指，佢哋今次係喺上環、中環、灣仔同銅鑼灣掛起足足24條橫額，而今次行動特別之處，更加係有一名家住千呎豪宅、喺中環銀行返工、年薪過百萬嘅70後加入，佢哋認為若果唔滿意社會現狀，應該身體力行反對政府不公。八方仲聽聞，呢批黃絲公僕準備喺政改表決前登廣告反對袋住先㖭呀。