最近政圈中人見到接連有啲富商出嚟撐政改，包括四叔李兆基、九倉前主席吳光正、嘉華集團主席呂志和甚至長和李嘉誠等，無不暗笑「阿爺又做嘢嘞」，否則富商點會咁得閒，專登出新聞稿又或者喺股東會上長篇大論講政改？而當中較為人津津樂道嘅可能係四叔，事關呢位股壇燈神將政改同股市掛鈎，話如果政改過咗，股市會升到3萬點，唔知有冇聽到唔少人心郁郁，為利益而想袋住先？
出口術難影響中產
花生友都同啲政圈中人吹過水，問佢哋：喂，乜富豪開腔呢一招有用咩？當然大家都唔敢百分百肯定係work，但有啲人就覺得，如果係所屬富豪持有公司嘅小股民，或者呢招心理戰都有少少效㗎，「可能呢啲係牛頭角順嫂等基層，賺一個幾毫飲餐茶都好開心，仲話畀佢哋聽過咗政改股市升到嘭嘭聲，除非好反對啫，否則有着數點會唔支持？」
但除咗基層小股民，政界中人相信對於中產同專業人士，富豪出口術影響力有限，事關佢哋呢班比較有獨立主見，「唔會貿貿然信四叔話升就升，亦都唔會為咗一個幾毫決定係咪撐政改」。
至於過咗政改，股市係咪升呢？嗱，呢個問題嘅前提，當然係政改要喺立法會攞夠票通過啦，但𠵱家似乎半點奇蹟都唔覺有喎。如果純粹從剝花生角度，唔少政界中人就買一定升過3萬，「就算四叔自己唔谷，阿爺都幫佢谷啦，大佬，呢啲嘢面子攸關，如果過咗之後，股市竟然係跌，第時啲有錢佬仲邊肯幫你做嘢呢？」
花生友